Lífið er fullt af tilviljunum. Fann hjá mér þessa skyndilegu þörf að blogga um litla frétt á mbl.is áðan. Þá tók ég eftir því að ekki hafði komið ein einasta bloggfærsla frá mér síðan ellefta apríl, í heilan mánuð, alveg uppá dag.... skondið.

Hvað hefur valdið þessu skyndilega fráhvarfi eftir stutt bloggtímabil og fáar færslur? Hjá mér sem hef hef yfirleitt skoðun á öllu og skipti mér af flestu. Þetta veldur mér heilabrotum........ kannski að ég bæti úr því.

Hugsa málið!!!

Kannski á þetta blogg ekkert við mig, er ekki hægt að fá kassa til að standa uppá í miðbæ Hafnarfjarðar, kannski á það betur við mig...... já ég held það.

Kassa á Lækjartorg, kassa á Glerártorg, kassa á hvert hringtorg í Hafnarfirði. Þá myndi ég ekki missa svona úr.

Rétt eins og kýrnar hlaupa um þegar þeim er sleppt út á vorin þá þeysast stjórnmálaforingjar núna um grundir og móa og dreifa kosningaloforðum. Gildir þá einu hvert innihaldið er, loforðalistinn þarf að vera langur og ná til sem flestra. Sé þetta skoðað frá markaðslegu sjónarhorni má sjá að markhópur sem flestir biðla til er láglaunafólk, aldraðir og öryrkjar. Er það vænlegast til árangurs í kosningum að biðla til þeirra? Já, ef þetta er stærsti markhópurinn á kjósendamarkaðnum.

Ég staldra aðeins við kosningamarkmið Vinstri grænna, en þeirra markhópur hingað til hafa verið umhverfisverndarsinnar. Það hefur skilað þeim á fljúgandi ferð inní kosningar, en þá er markhópurinn útvíkkaður og er núna umhverfisverndarsinnar og fátæklingar. Klókt hjá Steingrími J. að stækka markhópinn og róa á ný mið. Það verður athyglisvert að fylgjast með því hvernig sú herferð tekst, því eðli málsins samkvæmt þá lútir sá markhópur á kjósendamarkaðnum allt öðrum lögmálum heldur en flestir aðrir.

Í aðgerðaáætlun sem birt er á vef VG www.vg.is má lesa úrræði til að útrýma fátækt úr þjóðfélaginu. Flestar aðgerðir snúast um bætur og gjaldfrelsi. Hærri húsaleigu- eða vaxtabætur. Aldraðir fái bætur þrátt fyrir að stunda launaða vinnu. Leikskólar og skólamáltíðir gjaldfrjálsar o. fl. o.fl.

Er þetta það sem fólk vill? Vill það auknar bætur?? Vill það ekki geta lifað án bóta?? Jú, örugglega.

Það er tvennt sem stendur uppúr í aðgerðaáætlun VG en það er:

• 1) skattleysismörk verði hækkuð í áföngum
• 2) umtalsverð hækkun lægstu launa.

Þetta er það sem fólk vill til að komast úr fátæktargildrunni, annað skiptir litlu máli. Það er hætt við því að aðgerðaáætlun VG snúist í andhverfu sína og innleiði fátækt á fáum árum í stað þess að eyða henni.

Vissulega myndi það viðhalda markhópnum á kosningamarkaðnum, en ekki ætla ég Steingrími J. að hafa hugleitt það þó hann sé framsýnn stjórnmálamaður.

Ætli ESB slái á puttana á flugfélögunum sem innheimta misjafnt verð eftir því í hvaða landi flugmiðinn er keyptur/seldur. Vonandi........ en við erum bara í EES og kannski gildir þetta ekki þar.

	Framkvæmdastjórn ESB gerir enn athugasemdir við viðskiptahætti Apple
Ábyrgðarmaður færslu Tilkynna um óviðeigandi tengingu við frétt

Nú er maður loksins orðinn Hafnfirðingur eftir að hafa búið þar í 10 ár. Ástæðan er Alcan, þökk sé Lúðvík bæjarstóra. Fram að þessu hefur maður bara verið spurður "hvernig er að búa í Hafnarfirði?" eða þá "Hvernig er að vera fluttur í Hafnarfjörð?" En nú er öldin önnur. Þannig er að það er sama hvern ég hitti, flestir vilja ræða kosninguna um deiliskipulag álversins. Ekki það að mér leiðist það, þvert á móti þá tel ég mig vera sérstakan talsmann og málsvara hafnfirðinga í þessu máli og nauðsyn að ræða þetta við hvern sem vera vill. Ekki dró úr áhuganum eftir naum úrslit atkvæðagreiðslunnar, en ég er meðal þeirra 88 sem réðu úrslitum í þessu. Sjaldan, eða bara aldrei, held ég að skoðun mín hafi vakið jafnmikil viðbrögð og nú. Ekki það að ég sé á móti stækkun álversins, öðru nær, ég er bara á móti því að álverið stækki inní bæjarlandið. Ég á von á því að þannig sé um fleiri. Atkvæðagreiðslan snerist einmitt um það, hvort við vildum að álverið stækki inní bæjarlandið.